ضعف الراتب+ارتفاع الاسعار

[سندريلا]

منذ مدة ليست ببعيدة كان
يتسلم راتب قدره خمسة الاف ريال يستطيع ان يحيا واسرته في ترف حتى نهاية الشهر، اما
الان وبنفس الراتب لايستطيع ان يتنفس هذا الراتب او ان يصرف منه شيئا على احتياجاته
الشخصيه والضروريه. لنتخيل معا اسرة افرادها خمسة (اب وام وثلاث ابناء) عددمتوسط
للأسرة العربيه،يحتاج الاب الى صرف 200 ريال شهريا للكهرباء 500ريال للهاتف
1000ريال للبنزين 1000ريال لإحتياجات المنزل من طعام وادوات تنظيف 500ريال للجوال
1500ريال ايجار شقة من اربع غرف (يادووووووووب تكفي) 300ريال مصاريف مدرسيه (طبعا
رقم مستحيل يكفي ثلاث ابناء في مدارس حكومية) لقد قسمت الراتب تقسيم خيالي...لانه
كل الاسعار متضاعفة عند التجار واصحاب الملك وطلبات المدارس ..بس ماشي الحال خلونا
على هذا التقسيم المثالي. الا ترون معي ان هناك نواقص كثيره يحتاجها الفرد لاسرته..
يحتاج رب الاسرة الى : مبلغ جانبي للعلاج الصحي في احد المستشفيات الخاصةوالتي
لاترحم في اسعارها.. يحتاج الى مبلغ اضافي للمشتريات الخاصه بالزوجة والابناء من
ملبس ورحلة ترفيهيه واحدة على الاقل في الشهر. يحتاج الى مبلغ يدخره للأزمات كولاده
لزوجته او لإكرام ضيوف عنده من خارج المدينه التي يسكنها...الخ الخ الخ كثير من
متطلبات الحيااااااااة ،قليل من الدخل ،ارتفاع في جميع الاسعار..والتاجر لايرحم
ووزارة التجارة لاتراقب الاسعار . والله المستعان .

[sona]

ممكن تنحل المشكله بمساعده الزوجه ماديا اذا كانت عامله لاكن اذا كانت ربه منزل
الله يعينهم بعدين في مؤسسات بتعطي بدل سكن زي الخطوط رغم انها رمزيه (18000)سنويا
تفك ازمه وانتي بتعرضي راتب قدره 5000 في ناس راتبها اقل واضعف ايش راح يعملوا؟
والناس اللي بتشتغل في الخطوط او البنوك عندهم بونس وخدمات صحيه بترفعها عنهم لاكن
المدرسين ماعندهم حتى التامين الصحي ما عندوا الا راتبوا ورضا والوالدين. بعدين ما
ننسى الاولاد بيكبروا بتكبر مطالبهم واحتياجاتهم معاهم(لبس ,مواصلات, مصاريف
زواج<للبنت والولد>)وكل دي على ظهر الاهل والله يعين يا خوفي نصير في يوم زي
العماله اللي بتجي عندنا.

[nona]

فعلا حرام في بلد فيها
من الخيرات الشي الكثير وتصير كدا عيشتنا يعني لو اي بلد ثاني يشتكي من كدا عادي
لكن بلد كلها خيرات وصير حالنا كدا فهذه هي المصيبة العظمى،والله هدي ماهي عيشة.
وانت ياسونا بتقولي الزوجة العاملة هي في وظائف كفاية وانت اكثر وحدة عارفة ان
الوظائف اصبحت الحلم المستحيل لاي متخرجة.بعدين هل الخطوط والبنوك تسع لشعب
تعدادةاكثر من 16مليون.والله فعلا العيب مش في الراتب ابو 5000 العيب في زوال
البركة من الراتب الله يجازي اللي كان السبب. [Edited by nona on 28-04-2001 at
04:46 AM]

[goldplus]

الحقيقة بلد زي البلد هاذي من اكبر دول العالم في تصدير النفط و
صاحبة اكبر مخزون احتياطي للنفط في العالم وعلى هذا الحال والله شي يجيب البلأ
وشكلنا كذا يعني ممكن نكون اكبر دولة لديها متسولين مواطنين في العالم الله يعين
مكتب مكافحة التسول لا وبعدين يطلع المذيع في غصب واحد وبكل قلة حيا يقول تم تعيين
فلان بن فلان مستشار فى مكتب فلان بن فلان بمرتبة وز........ طيب احترموا مشاعر
الناس هاذي اللى ماهي قادره تلاقي عمل والمواطن زي الـ......... والله حرام انا
شايف شباب زي الورد وبملابس عامل نظافة في الشوراع والمكانس في بلدية البا......
والجميع شاف هذا في جريدة عكاظ العمل ((ياخوان مو عيب بس عامل نظافة في البلدية وفي
الشوراع وفين في السعووووووووووووووووووووووودية)) والله حرام ناس الوظيفة تجئ لين
عند الباب ويستلام راتب ويمكن ما يروح الدوام من الاساس والشهادة سادس ابتدائي واذا
كانت جامعية بالوسطة من بالى بالك .وناس تكافح ايام وليالي وبعد هذا مكنسة و كرتون
زباله والراتب شويه عمله 1000 واذا طقتها الحمى 1500ريال طيب هذا الموظف ابو
1500ريال متى انشاء الله بيتزوج ويفتح بيت وهل يكون على المدى البعيد انسان شريف لا
يسقط في فخ الانحراف والجريمة من اجل المادة ولماذا فى الوقت الحالى نسمع عن الكثير
من السرقات وعملية النصب والاحتيال وارتفاع معدل الجريمة الان احد يقدر ينام ويترك
مفتاح السيارة عليها؟ واو باب العماره مفتوح؟ لماذا بعد الساعة الواحدة ليلآ وشوف
اقرب صيدلية الابواب مغلقة يادوب فتحة صغيره تتخاطب منها انت والصيدلي ؟لماذا
ولماذا احد اسباب انتشار الجريمه في مجتمعنا هي المادة ايام الطفره نسمع عن جرائم
ولكن بشكل بسيط جدآ اما الان الاموار من حفرة في دحديره ويا قلب لا تحزن ...
والسلام [Edited by goldplus on 29-04-2001 at 02:34 AM]

[sona]

من فتره بسيطه بداء
مشروع السعوده واتطبق في بعض المشاريع والاعمال لاكن مش كلها . يعني انا اذكر قبل
فتره انو اول سعودي قام بشغل يعتبر (صغير) كان جرسون في فندق في الطايف وشوف
الهيلوله اللي عملوها ليه من توسيموا وسام الشرف ورفع راتبوا وكتبوا عنو في جريده
عكاظ, حلو ما اختلف معاهم لاكن كون انو الدوله كبيره وغنيه ما يمنع من انو يشتغل
شبابها اي شغله لاكن انو يكون جامعي ويشتغل باقل من شهادته هاذا الحرام بس في
مشكله! مين الولد السعودي اللي راح يرضا على نفسه ويشتغل بناء او نجار او ميكانيكي
او سمكري؟؟ الشغل مو عيب لكن التوزيع الاداري فيه اجحاف والواسطه شغاله
100%100والبلد غنيه والناس تعبانين والله يعين

[حاكم العدل]

السلام
عليكم إخواني الحال ساء لدرجة غير متوقعة شباب متخرجين من جامعات وبتقدير ممتاز
وجالسين ياكلو فصفص على البحر ولا تلاقيهم شغالين في الحلقه وبراتب ياخذه الجاهل في
الدول الثانية واخر حل يلاقيه الشباب في السعودية أنه يقبل بهذا الوضع أو السفر
للعمل في الخارج وتلاقيه يحترم ويقدر في الدول الثانية وبعدين تلاقي الجرائد مكتوب
فيها هجرة العقول العربية إلى الخارج وتقدر ب200 الف عربي وللأسف هنا في السعودية
لا تجد من يحترمك ولا يقدرك بس يبون يحطونا في الحوش ويرمون لينا البرسيم نقوم
نحانا ناكل وبعدين يجوعنا لين نصير زي حقون المتصدع.............. ولا حول ولا قوة
الا بالله

[Asr]

والله مساكين .. لانكم بتنفخوا في قربة مخرومه يا جماعه انتو
طالعوا في مجتمعكم وانتو تعرفوا العيب فين هنا المسائل كلها ماشيه بالعكس وفيتامين
واو .. شغال زي الحلاوه تتوقعوا شاب او شابه متخرجين وفرحانين بشهادتهم يقدر يورّي
وجههم لمسؤول توظيف بدون ما يكون معاهم كرت او ورقة ممضية هادي معادلة النجاح في
هذا المجتمع كرت وواسطه .. والمسائل كلها تسير زي العسل .. افهموها بقى !!!!
_______________________________ يا ناس عسل .. عايشين في عالم مليان زفر ..

[nona]

والله ما اعتقد ان مافي احد فاهم موضوع فيتامين واو
اللي لازم يكون قبل وثيقة تخرجك؟ لكن المشكلة صارت ان فيتامين واو دا مو دايما فعال
يعني لازم اللي بيتوسطلك راح يستفيد منك في وقت اخر!وحلني ازا كنت مني قادرة افيد
نفسي راح افيدة كيف..؟! فعلا احنا جيل يقولوا ان اوفر حظ من اللي سبقوه علشان
التكنولوجيا والمعرفة و..و...لكن مايعرفوا ان احنا جيل مالة اي داعي لاننا شباب
قاعدين جنب اهلينا لا مستفيدين مننا ولا شي وعلشان الامور تزيد سوء على حظنا المنيل
تصير الواسطة لها معايير وشروط يعني لازم تكون ابن فلان الفلاني عشان علان العلاني
يخدمك ولا احترم نفسك وخذ ملفك من قاصرهاولا توريهم وجهك.

[Asr]

فيه اسباب كتير تخلي صاحب الواسطه يطيكي وجه ...: اولا : احساسه بالعظمه انو
اعطاكي فيتامين ... بدونه حتصيري مخلل في بيت اهلك ثانيا: الفايده المتبادلة واللي
عادة بتكون الضعف .. مقابل فيتامين صغير (هادا شي ما يحتاج نناقشه) .. ثما الفايدة
ممكن ما ياخدها منك .. حياخدها من انسان يهمه امرك .. وتكون عند اخينا مصلحه هناك
.. وطبعا مبدا نفّع واستنفع.. واللي بغلبوا العبوا.. او ممكن يكون راسم على المدى
البعيد.. والصغير اليوم .. كبير بكره .. والحساب يجمع ثالثا : المنظره ... يعني لو
مافي اي سبب من الاسباب السابقة .. وشاف نفسه ما ح يتعب (طال عمره) ويقوم من مكتبه
عشان يسوي الفقيتامين .. ... ح يسوي .. بس قبل ما تدوقيه .. ح يقول لكل اللي عرفهم
.. او اللي ليهم صله بالموضوع .. ترى شوفوا انا اللي اعطيتها الواو .. يعني دعايا
.. وانتي ما ينوبك منها غير الذل .. والنظرات النص كم ... باختصار .. مافي شي لوجه
الله تعالى .. ولا يغرك ... انتي زي بنتي .. والموضوع مو بيدي .. كله كلاك نمك
وهمبكة ...... والله اعلم

[sona]

الحل مو في الواسطه
الحل في الوظايف يعني يدبرولنا وظايف ولا البلد حتخرب اكتر واكتر بعدين في حاجه
الموظف الاجنبي من فئه(A ) بياخد راتب احسن من السعودي اللي معاه دكتوراه. تحطيم
درجه اولى . طيب نسيب الناس دول ونلتفت للمعاهم ثانويه عامه(اللي ما
قبلتوالجامعه،اللي ظروفو ماتسمحلو او اللي انفصل من الجامعه) في مين الله يستر عليه
وفي مين اشتغلو اي شغله بس المشكله لمن يلاقي مديرو فلبيني وبيصرخ عليه قدام الله
وخلقو هنا القهر

[Asr]

يعني يا جماعه هيا المشكله كلها في الوظايف ... المشكله اوسع من كدا



في طلبات البيت ..
الضيوف
الاولاد
طلبات العيد
الاجازه والسفر ..
يعني من جد ... الحياة كل مالها بتصير اوسخ .. وحنا كلنا بنقول مين السبب ..

مو مهم دحين مين السبب .. المهم اننا نلاقي حلول فعليه للاوضاع الصعبه دي ...


ايش رايكم
آسر

[كانديل لايت]

السلام عليكم ورحمة الله وبركاته
تحياتي لكل اعضاء المنتدى

ضعف الراتب+ ارتفاع الاسعار

اعتقد انه حان الوقت ان الموظفين الحكوميين يشتغلوا بعد الظهر عشان يدوب يقدروا يعيشوا في مستوى معقول !

وبالنسبة للي بيشتغلوا في القطاع الخاص _ اتصور انهم لازم يكونوا في عملية بحث دائمه عن عمل آخر ولا يكتفوا بالوظيفه اللي هما فيها 00 ألين ما ربنا يسهل ويلاقوا الوظيفه اللي تتناسب مع شهاداتهم وخبراتهم وقدراتهم وامكانياتهم ( وقبل كل شئ تتناسب مع الارتفاع الفاحش في الاسعار !! )

[سلطان مكه]

الله يعين
بس هذا في الا يام العاديه...
لكن كيف راح يكون الحال في ايام المصاريف الزايده مثل قبل رمضان وقبل العيد
اكيد راح يضطر رب الاسره للاستلاف طيب استلف كيف راح يرد الدين
خليها علي الله

[n3na3h]

السلام عليكم ورحمة الله وبركاته

انا ماانكر الحال المايل اللي احنا فيه وزيادة المصاريف والغلى

لكن ربنا قال اسعى ياعبدي وانا اسعى معاك والشباب دحين يايتوظفوا وظيفه كشخه يايقعدوا

على الفصفص ويقول مالقيت شغل يعني ايش فيها لو كان جامعي واشتغل سباك مثلا

والله مافيها شئ بس الشباب هد الايام يبغو يقعدو على المكاتب مرتاحين وتجيهم الاوراق لحدهم

علشان يوقعوا عليها


نعناعه.