تأملات بنت الحاره القديمه

[المكاويه]

امس بس كنا نعيش في الحاره بكل مافيها من اصول وتقاليد الى ان جاءت الطفره وخرجتنا من الحواري الى الاحياء الراقيه وسلختنا من جلودنا، اكيد مافي احد ضد الحضاره والتقدم ولكن انا ضد الفهم الخاطئ لها.
ياجماعه هل من الحضاره انك ماعدت تميز بين الولد والبنت.كان الولد من صغره يفتخر برجولته "وهو لسه ماطلع من القفه" اليوم صار الولد بس يضارب على "اللفظ" لفظ كلمة رجل، لكن طالع فيه ياعيني ...شعر للكتوف....شعر مفرود للكتوف...وحواجب مقصوصه ...ومكياج... وماشيه مكسره ...و....و....و
تلتفت للبنت تلاقيها "استرجلت" ياسلام على الدبابه اللي في رجليها ارحمينا ترى الجبال انزالت والانفاق كثرت وقشرة الارض ما عادت تتحمل "رفس " قدميك...وغير طبعا طريقة الكلام واللبس و...و...و....
كل هذا والاهل يتفرجوا ماشاء الله الاب فرحان بولده او بنته ويقولك حريه شخصيه ،والادهى من ذالك القصه الواقعيه التي شاهدتها امامي عندما حاول عم احدى الاولاد لردعه عندما راءه مطيل شعره ،رد عليه ابو الولد وقالوا "الرسول كان مربي شعره"بالله عليك هو ولدك فكر ان يقلد الرسول ولا جاء على باله؟
كنا في الحاره القديمه الجار يرد ولد جاره وما احد يزعل ..اليوم كلم ولد اخوك ورده ،اذا احترمك الولد اكتفى بان يعطيك كلمتين في عظمك هذا وان ما كمل اخوك الناقص!
ليه ياجماعه صرنا نطالع للفنان الفلاني او العلاني ونقلده،ما في احد يطالع للعالم الفلاني اللي ياعيني راح عمره في البحث عن المعرفه والدراسه.
ياجماعه ترى حولينا مجموعه كبيره اخذت قشرة الحضاره ...وبس!

[sona]

بالعكس يا مكاويتي العزيزه الناس ما بياخدوا بالقشره الخارجيه للحضاره انما بياخدوا طبقه الغبره الخارجيه اللي على القشره دي
فعلا التربيه اختلفت اتذكر زمااااااااان لما الوحده فينا ينشخط فيها من ولد عم ابو جار عمها كانت تستحي وتخجل حاليا حاولي تشخطي في بنت اخوكي وانتي واثقه من نفسك انك على حق وبدافع تربيه البنت اللي في النهايه حامله نفس لقبك وشوفي ايش راح يصير ليك(لاتجازفي العواقب وخيمه)
الوقاحه اصبحت من صفات هذا العصر لما طالما الاب والام يعتقدون ان الحفاظ على كرامه ابنائهم هي عدم تربيتهم او ردعهم عن فعل الاخطاء
في صغري كانت (زغره عين) من الوالد او الوالده بمثابه الصفعه والان نزغر نصرخ نهزء ولا حياة لمن تنادي
تكون في امان الله ما تلاقي الا الجن المسلسلين انفلتوا عليك والام والابو زي ما هما اذا الجدر نطق هما حيفكروا ينطقوا:rolleyes:
بس انا عندي امل كبير في الموضوع دا يعني البنت المسترجله(;) )ممكن في يوم تشعر بئنوثتها في سن معينه
والولد كمان والدي كان متعصب للشعر القصير وكان كل يوملازم يصبح الاولاد بموال عن لزوم قص الشعر لسه من خمسه ايام لقيتله صوره شعرو كان فيها طويل مع العلم والدي من رجال مكه القديمه:D

[nona]

سونا هنالك فتيات لا يستطعن ان يجدوا جمالهم في انوثتهم . اعرف فتاة متزوجه ولديها طفل ومازالت ترتدي "عارفه الحدايد اللي في الجلد اللي اعتقد ان المصارعين يلبسوها"،شعرها تلم ثلاث ارباعه والباقي محلوق اظن واحد انش "يعني كل ماشوفها تفكرني بالتين الشوكي"،و ساعات الرجال وعطور الرجال وطريقة الكلام والمشي، والله المستعان.نفسي اعرف زوجها كيف متحمل ايشوفها بشكل هذا:confused:

[بزبوز]

الاخت مكاويه
سلام قوام بالمكاوي واحترام وبعد
ليس هناك ارتباط بين خروجنا من الحواري ومضمون المقال فمازال ابناء الحواري يتصرفون نفس التصرفات التي ذكرتي بالاظافه الى ان هذه الظاهره هي ليست جديده ولكن استشرت في المجتمع هذه الايام مع انفتاحنا على ثقافات غير اسلاميه وكثرة القنوات الفضائيه واصبحنا نراها حتى في بيوت الشعر لدى البدو0
ولكن اعود واقول ان تربية الابناء هي مهمه عسيره على الاب في مثل هذا الزمان بالاظافه الى ان اعلامنا الداخلي لم يقوم بدوره حيال هذه الظاهره من تقديم النصح والارشاد للاباء والابناء على السوء 0ولكن من يحسن تربية ابنه اليوم يجني ثمارها غدا

[ترنيــم]

مرحبا
مو بعيد يكون ان الطفره سببت طفره في الهرمونات عند بعض الناس :)
فالبنت استرجلت والرجال استبنت
بعدين حلوووه منك يا نونا التين الشوكي دي ...هي هي عجبتني
:confused: :p :

[nona]

الاخ بزبوز قد تكون كلمة "حاره" في المقال كناية عن البساطه في العيش و الانشغال في الامور الهامه بدلا من التوافه لاننا جميعا نعي بان في الايام المنسيه "ايام الحاره" كان الرجل فخور بتحمله المسسؤليه وكانت الفتاة تحب ان تكون اما صالحه و مسؤوله.

[المكاويه]

شكرا للجميع على اهتمامكم بالموضوع.
سونا ملاحظه بسيطه: ترى زمان كان الرجل متحمل مسؤليات جامده وكان قدها لكن اليوم صار هم بعض الشباب الموضه وبس.شكرا للجميع.

[مكاوى]

السلام بداية الكلام

الحاره اه على الحاره والله يجماعة الخير قلبتو عليه المواجع انا ما ادرى ايش اعماركم لكن الحاره زمااااااااااااااان كانت غير شكل وخلينى اقولكم شوية حاجات كده على الماشى زمان كانو سكان الحاره يعرفو اسامى بعضهم لخامس وسادس جد ويعرفو دا ولد مين وامه مين وخاله وعمه الخ الخ وكان عمدة الحاره يسير ابو العيال اذا سافر الابو يجيب حجاج وكان الجار يخبط على ام فلان ويجرى يوقف بعيد عشان يشوف ايش تبغه من الحلقه عشان ابوالعيال مهو موجود وكان الواحد يقول ياساتر الف مره وهوداخل البيت مع راجل البيت مو دحين الجار مايعرف جاره ومايصدق الرجال يمشى من هنا عشان يعاكس حرمته ولا بنته ولا حتا ولده فينكم من الحاره هوه عاد فى حاره وان كان فى حاره الناس غير الناس والرجال غير الرجال والنفس اتغيرة والله المستعان.

[الجوكر]

اقول لك يامكاوية يالغالية
انا معجب والله واحس بغيرتك والله على دينك وعلى ابنا دينك والله عز وجل يجزيك كل الخير ولكن كل ماقولة لك
ان لكل زمان ناسه وسوف ترين العجب في زمننا الاغبر هذا
قد يكون المشاهد التى تصادفك قليلة ولكن نحن الرجال نجد الكثير والتهاويل والله يشهد
ولكن ادعى ان يصلحهم وان يحمي الباقين اللهم امين

النهاية




الجوكر .................................. جدة

[قلب الأسد]

سيدتى الفاضله المكاويه .......امساكى الله بثوب الكعبة

( الحاره ) اى الأحياء القديمه ماتزال موجوده ولم يتغير فيها الكثير . انما النفوس هى التى تغيرت سيدتى وكما تفضل الأعضاء الكرام لم يعد الجار يعلم من يسكن امامه او بجانبه كلا فى بمن فى قلبه من هموم . والله المستعان....

وتقبلى تحياتي...

[طلبة]

نفس هادا الكلام قالوه الجيل اللي قبلنا عننا ،

ونفس هادا الكلام قالوه الجيل اللي قبل قبلنا قالوه عن اللي قبلنا...وهلم جر. ودايما هناك الطيب اللي يشوف كلام اللي قبله دايما صح.


اسمحولي ، الكلام ده كللللللله غلط (في نظري).

كل جيل يجي ويطلع القطط الفطسة في اللي بعده ، ولا كأن هادا الجيل هو نتاج اللي قبله.

الأب اللي طلب من ولده إنه يقصر شعره ، والأب اللي يطلب من ولده إنه يمشي بنظرة العين ، واللي يشوف إن ولده استبنت وبنته استرجلت وووو. فيه احتمال كبير إن هادا الأب طول شعره في فترة من الفترات ، أو سوى حركة كان أبوه يشوف إنها غلط وهو أصر عليها من باب إنها صح...

هادي كلها خصايص مرحلة حياتيه ، مرحلة إنه يخرج عن المألوف ، مو حكاية إنه طول شعره زي البنات ولا البنت صارت تمشي بجعرمة أو استمرد واستمردت وما صارت نظرة العين تمشيهم.

[S a m s o M]

فعلا الوضع محزن جدا بس ايش الحل ازا كان اللي يربو الجيل دا هما من جيل الحواري والاخلاق الفاضله..يعني الشباب دا ناتج عن تربية جيل الحواري ( البساطه والاخلاق)...
بس الجيل دا احسه انه مظلوم ومغلوب على امره..مو باادافع عن السيئين من الجيل دا..بس واحد اول مايفتح عينه على الدش....ومافي اي رقابه ...واحد اتربى على يد الشغاله ....وهوا في عز شبابه واخطر مرحله في عمره ..الشغاله تصحيه على المدرسه ....ونفس الشي على البنات .....والخرجه مع السواقين من غير محرم .....وانا من وجهة نظري انه اخطر شي هوا السواقين والشغالات ....ومن قبلهم البرامج الحقيره اللي في التلفزيون....فالمفروض انه النصيب الاكبر من اللوم يكون موجه للاهل اللي مريحين بالهم والطناش هوا االمسطير على تفكيرهم...ياجماعه والله الجيل دا مسكين بكل ماتعنيه الكلمه ...جيل يحاول يتعلق باي شي يخرجه من الفراغ اللي عايش فيه ..جيل يحسب اللي بيشوفه على التلفزيون هوا التحضر ..واي شي يجي من الاهل تخلف ورجعيه....واعتقد انه دا ناتج من شي مهم ...اسلوب الاقناع ...يعني البرامج والمسلسلات او حتى الاعلانات تحاول تقنعك باي طريقه ممكنه وانت اب او ام وعندك اولاد ..فمابالكم اللي عمره ماتاتعدا العشرين ...اي فكره اي يحاولو يثبتوها في اذهان الشباب راح يقنعوهم فيها ودا راجع لللاسلوب في حالة غياب التوعية ولو مافي خلفيه دينيه عند الشاب او الشابه..ونجي للاسلوب الاهل دحين في الاقناع او حتى التفاهم....للاسف جهل + جهل + جهل.....حتى الاهل احسهم متشتتين بين اسلوب التربيه اللي يعتمد على التحزير او استخدام الضرب ..وبين اسلوب التربيه الحديثه بالكلام الحلو اللي مايودي ولا يجيب ويابابا عيب كدا وياماما مايسير كدا ...وهوا قد الشحط وشنبو في وجهو ويقولوله يابابا...
بصراحه انا اشوف انه ماينفع غير اسولب الشده في التربيه بس وقت اللزوم مو خلاص يسير الضرب والصراخ لغة الحوار بين ولي الامر والولد او البنت..لا ساعة اللزوم بسسس
تاني شي للاسف حتى اسلوبكم انتو بصراحه يتخللو كتيييييييير من التكبر والغرور واستنقاص الناس...يعني انتو ماشالله اللي باين من كلامكم انكم ماشالله على مستوى عالي من التربيه والذوق والادب والاخلاق و....و.......و الخ....مو معناة كدا انكم تستنقصو االلي ماانعرف ايش هيا ظروفهم ..ايش الاشياء اللي مرت عليهم حتى وصلو للدرجه دي يعني انتو الحمدللله لقيتو احد يربيكم على الاخلاق ...طيب اللي لقى نفسو كدا في وسط ناس ماتعرف شي عن التربيه او الذوق ..ايش ذنبه يواجه الكم الهائل دا من التريقه والاحتقار ...يعني هوا مو بيده انه يطلع مو متربي وانتو مو بيدكم انكم تكونو متربين ...كله ارادة ربنا فاللي خايف على مصلحة غيره وعنده غيره على اخوانه في الله... ما اظن انه بدي الطريقه ممكن ينصحهم..بالتريقه عليهم ونخليهم لابسين دبابات في رجولهم والارض بتتهز منه ونخليهم تين شوكي..وهما بشر زينا زيهم .تعتقدو انه بدي الطريقه انه راح تغيرور شي؟؟ بالعكس انتو لمن تهينو انسان وتتريقو عليه اول شي راح يكرهكم وبعد كدا لاتتوقعو انه يسمع اي كلمه منكم بعد كدا حتى لو كان غلطان الف في االميه..وبعدين اللي لاحظته من مناهج المواد الدينيه في كل مراحل التعليم من لابتدائي الييييييييييين السانوي.....كله يركز على الاحتفال بالمولد شرك....انك تقول عن الله وفلان حرام انك تقول مدري ايش شرك اصغر......الخخخ
للاسف مركزين على شي ومهملين جانب مايقل اهميه عن الشرك اصغر وظاهرة الاحتفال بالمولد النبوي الشريف بغظ النظر عن انها حلال او حرام هادا مو موضوعنا ....بدليل انك لو وقفت واحد يرقم في السوق وقلتله على سبيل المثال ايش رايك في المولد او غلطت وقلت قدامه الله وفلان ....ينط في حلقك ويقلك كيف تقول كدا هادا حرام...وتلاقيع في تففس الوقت داير يرقم....وهادا الشي لاحظتو في شباب كتييييييير انه مسوي السبعه ودمتها وعند الاشياء دي يقلك حرام...يعني لو ركزو في المناهج على الاشياء الرئيسيه والمهمه واللي تأثر على سلوك الشباب مو كان احسن ؟ على الاقل لو مافي تربيه يكون فيه مخافة الله...طبعا انا ماباقلل من اهمية الاشياء اللي بيركزو عليها بس للاسف انا شايف انه اهون عليهم اانك تخرج مع بنت من انك تقول مولد نبوي او تحط يدك على شباك الحجره الشريفه ويقلك تمسح بالقبور ..

[المكاويه]

سيدي قاب الاسد...
نعم ان النفوس تغيرت وانا ارى ان الحب الشديد للماده هو السبب,يا سيدي كانو زمان يجتمعوا على المويه الفايره و يفتكروا بعض في كل صغيره وكبيره اما هادي الايام صار كل واحد يالله نفسي.
معك حق يا طلبه قد يكون الآباء يوما من الايام ربو شعرهم(خنافس)بس ترى كان الواحد فيهم بمية راجل.اليوم التغيير مو بس ظاهري بل اصبح جوهري.بالله قول لي م ولد صادفته وكان يعتمد عليه كرجل ,ايوه في لسه الخير لكنه قليل جدا.بعدين زمان كان الولد ما يقدر يرفع عينه في عين اخوه الكبير بس دي الايام صار يقاوح حتى ابوه ,وتعال شوف ياعيني الابهات اللي ما كملوا تعليمهم وكيف يضحكوا عليهم اولادهم ...مع الاسف شايفين الحضاره والحريه بطريقه سلبيه جدا.والمرحله الحياتيه اللي انت بتتكلم عنها اصبحت طويلللللله في الاول قلنا صغار وبعدين مراهقين ..طيب والنهايه:(
اخي samsom ..الشغاله ضرب من ضروب الحضاره الزائفه (في ناس يطلعوا وهما ما عندهم عيال بس لازم تاخد الشغاله معاها عشان تتفشخر بها,وكلنا يعرف مدى تأثير الشغالات على الاطفال,فعلا يمكن في الاجيال دي بنحتاجها عشان الام عامله بس لمن بترجع من العمل فين دورها كأم (ليش كل شئ تسويه الشغاله حتى العيالوالله لاتتزوج ابرك لها من انها تطلع جيل غريب عن ديننا وعاداتنا ,لا وحتى لغتنا).
انا معاك في التوسط بين الشده واللين في التربيه ,بس والله في امهات يبغالهم هما تربيه مافيها تهاتي مع عيالها تقوم تاخدهم كمان عند الناس عشان يجيبوا لهم البلى وهي فرحانه وبتضحك وحاطه الشيشه ان وجدت وتطق حنك حتى مافيها تنتبه عليهم عند الناس قال ايه _تربيه حديثه_:( .
اما بالنسبه لموضوع الغرور صدقني انت فهمت غلط احنا بنكتب في المنتدى عشان كل واحد فينا يعدل من سلوكياته وعشان كدا كان في اسماء مستعاره عشان لا احرج نفسي ولا احرج غيري..احنا بنحاول انقاذ ما يمكن انقاذه من خلال تبادل الرأي مو الاستهزاء والتريقه

[عروسه جده]

والله الموضوع مررررره حلو مكاويه بس اقلك شي نعيب زمننا والبعيب فين ولو نطق الزمان لهجانا عزيزتى مكايوه الحاره لسه موجوده وعيال الحاره لسه فيه وغيره عيال الحاره على بناتها موجوده بس احنا الى بعدين عن الناس هدول بطبيعه الانشغال الى صار فى الزمن هذه يعنى كان زمان الواحد يصلخ شغله وكل شي الساعه 8 الليل ويتعشي وينام ويصحى بدرى يروح شغله الى هوه عباره عن دكانه ويزور اصحابه فى المقهى الى اصلا جم دكانه بس لاتلومى اهلناااا دحين ترى والله متطلبات الحياه صارت كده الرجال ياعينى يدوبك يقوم يصحى بفطر ويروح الشغل الى هوه دوام الله يعلم بحاله لالالالا هذه كمان اذا ما كنت عنده شغلانه تانيه عشان يعيش اولاده احسن من عيشته ويوفرهم الى هوه كان محروم فيهاااا اذا العيب اساس من الام ست البيت فين عن هدول وهدول والله انو في امهات تجلس في الكوفى و(الارقيل) في يدهااااا ولاابسه العبايه المخصره كيف تبغى وحده زى كده تكون قدوه لبناتها واولدها البنت تقول لاامها هاتى شفطه يسلااااااااااااام على الحريه المطلقه اناااااااا لو اقول الامى هاتى شفطه تعطيـــــــــــنى كـــــــــــــــــــــف يلصقنى في الحيط اصلالالالا انا ما اقدر اقولها ولا امى من النوع هذه الحمد الله
انا اقلك عيب الزمن تربى بس على كلمة حرااااااااااام مو زينااااا ياعنى قبل حرام كان يتقلنااااا عيب يا بنت عيب يا ولد وكان قدامك من غير حتى انك شي واقف اذا غلطى على جارتك هيا مو خالتك تقول امك اضربيها اضربيهااااا ربيهاااااا للجــــــــــــــــــاره والجاره عاد ما تصدق
ههههههههههههههههههههه
اما عن الموضه كلنااااا جات لنا فتره وتروح صديقنى انا امى مرررره قالت انا اموت واعرف كيف تلبسو الكعب العالى هذه وكان لها صوووره لابسه سلم نجاه تحت رجلهاااااا
وشكررر واستحملونى على الاطاله

[مدينيه عسل]

بصراحه انا اتفق مع الي قالو انو دا الجيل مظلوم

وبعدين على حكاية العادات الغريبه الي انتشرت بين الشباب والبنات زي تطويل الشعر (( للاولاد )) و الحركات المسترجله الصادرة من بعض (( البنات )) انا اشوف انها ماهي ظاهرة في دا الجيل وبس , لانو حتى الاجيال الي سبقتنا كان فيهم دا الشئ . على سبيل المثال كل واحد يطلب من ابوه ولا خاله و لا عمه او اييييييييي احد كبير صورة لي من حوالي تلاتين ولا عشرين سنه اكيييييييييييييييييييييييييييييد حتلاقيه كان مطول شعرو (( كدا منفوش )) و سوالف ( كانها تلطيشه ) هادا غير البنطلون الشارلوستون ( الوردي ) المحزق  . ولا عاد ازا كانت صوره بتوب وغتره الله احلى واحلى حتلاقوه لابس توب محزق بازارير من الرقبه الين الصره هادا غير شعرو الطويل الخارج من ورى الغتره  و كمان كان في كتيييييير من البنات بيقصوا شعورهم مررره قصيره (( او بمعنى اصح قصيره بالنسبه لداكا الزمان ايام ماكنت كل وحده فيهم ضفيرتها تلاته امتار )) هادا الشئ كان بيسير ايام زمااااااااااااااااااااااااااااااان ايام التربيه , ايام اولاد الحاره , ايام العيب والاصول فمابالكم دحييييييييييين ؟

و بالمختصر المفيد , الين ماتقوم القيامه حيفضل كل جيل يعايب على الجيل الي بعدو و يقول (( الله يرحم ايامنا ))
افتكروني بعد تلاتين ولا اربعين سنه , بعد ما تشوفو اولادكم واحفادكم (( انشالله ازا ربنا ادانا طوله العمر ))